Corbàs coquinàs

 

Que m’apèras corbàs, corbaish o agraula. M’arreconeishes pr’amor que soi gran (45 a 50 cm deu cap a la coa) e negre.  En França deu nòrd, que i a sustot lo men cosin, lo corbeau freux. En Gasconha que som las corneilles noires. Qu’èi ua votz arrauca* e que disi croà, craà e, a còps, o-in o clocloclo. Qu’aimi de víver en parelh.

Lo men cosin deu nòrd que ditz cà o àà, que’u manca plumas au torn deu bèc e que viu en corbada (grana colonia de corbàs) ->

En Gasconha, que disen ua cançon entà imitar lo men crit :

T’on vas ? T’on vas ?
Tà la lana, tà la lana…
Qué har ? Qué har ?
Minjar crapauts, minjar crapauts…
Son bons ? Son bons ?
Com lard, com lard…

Mes que sèi hèr autes sons coma imitar un motor o lo crit d’un aute ausèth.

Un ausèth esberit

Que soi un ausèth viu, esberit, intelligent. Autant com un mainat de 4 o 5 ans, hòu qu’as comprés !
Que sèi hèr un puzzle, emplegar utís, panar un peish sus la canavèra* d’un pescaire, getar pèiras sus un mainat qui’m vòu destorbar au nid e mèma que sèi hèr deu mòrt* !

Que m’agrada de jogar dab calhaus, pinhas* o autes joguets. E’m vòs véser sus ua eslissadera* ? Espia aquera video.

Ne me hasquis pas mau, que sèi arreconéisher la cara d’un uman e que'm brembi. Que poish estar maishant, e que soi capable de’t denonciar aus autes corbaishs pr'amor que sabem comunicar.

Que vivi longtemps, 20 ans o mes. Las gents qu’escrivón fablas dab corbàs com Lo corbaish e lo renard o enqüèra Lo rei de las agraulas.

Anna-Pèire Darrées

Vocabulari

Arrauca : rauque

Canavèra : roseau ; ici canne à pêche

Eslissadera : luge

hèr deu mòrt : faire le mort

pinhas : pommes de pin