Ajon que sauneja d'anar sus era Lua
Eth ivern que d'ei passat. Era primavèra que d’ei arribada. Eras marmòtas que sorteishen dera tuta. Que van cercar de qué minjar. Quan eth ser qu'arriba, Ajon que s'ajaça ena ièrba e qu'espia eras estelas:
– Oh, be son beròias aqueras estelas! Que luseishen! Era Lua que d'ei tota ardona e qu'esclaira era montanha.
Ajon, tota patziva, que s'adrom... E que's hica a saunejar...
Que sauneja... Qu'encontra un robòt explorator: Tòto 931.
– Adiu, Ajon!
– Adiu Tòto 931! Qu'aimarí anar sus Jupitèr.
– Oh, bona idea!
Tòto 931 e Ajon que pojarà dens ua socopa volaira. Un còp sus Jupitèr, qu'an tròp de hred. Que tornan a partir sus Mars.
– Oh, quina calorassa! Non pòden pas demorar ací! Que nse'm vam brutlar eras patas! ce'u disen eths explorators.
Que tornan a partir en viatge e que s'apressan de Saturn mes qu'an paur qu'un calhau e destruseish era socopa. Que hèn un virolet e que's pòsan sus era Lua.
Ajon que hica eth sué escafandre e que davara dera socopa. Que pòsa un pè, que hè un saut e Tòto 931 que'u pren era man e que ditz:
– Qu'èi ua idea! Que vam escríver eths nostes petits noms sus un drapèu e dessinar era crotz occitana. Puish, que lo vam plantar !
Ajon e Tòto 931 que's hican ath tribalh...
Ajon que's desvelha e quan aubreish eths uelhs qu'a er’impression de véder era crotz occitana dessinada sus era Lua.
Espiatz vosautis tanben, eths sèrs de plea Lua, e que vederatz aquesta beròia crotz.
E cric e crac era nosta istòria que d'ei acabada.
Escòla de Lus, seccion bilingua CP-CE1
Tèxte premiat ath 30au concors bigordan d’expression gascona
Despartament deras Hautas-Pireneas