De Caòs a Zèus

Totas las civilizacions que vòlen compréner coma lo mond estó creat e quan ne saben pas, qu'imaginan un mite. Los Grècs que disèvan que tot prumèr, n'existiva pas sonque Caòs, puish que neishó Gàia la tèrra, Tartar los in·hèrns, etc.

Gàia que balhè neishença a las montanhas, a la mar e a Orànos, lo cèu estelat. Puish Gàia que s’uní a Orànos, e qu’avón mainatges: 12 Titans, 3 Ciclòps, 3 Ecatonquirs. Mes lo lor pair non los aimavan pas, e que'us embarrè au mei hons de la Tèrra. Alavetz lo titan mei joen, Crònos, dab l'ajuda de la sua mair, que's revoltè contra lo pair. E que liberè los sons hrairs, los Titans.

Crònos que raubè lo tròne au son pair. Que's maridè dab la soa sòr Rèa. Mes Crònos que sabèva qu’estosse au son torn destronat per un deus sons hilhs (qu'èra ua prediccion de Gàia e Orànos). Alavetz, que devorè shens pietat los sons mainatges a la lor neishença.

Totun, un còp, Rèa qu'arribè a estujar lo son darrèr vadut: Zèus. Quan devó miar a son marit lo nenè entà que'u mingèsse, que'u presentè ua pèira envolopada de borrassas. Que l’avalè. Zèus, lo joen diu, que creishó estujat sus l'isla de Creta. Vadut hòrt e en atge de's venjar, qu'auherí au son pair un béver magic qui'u hasó vomir los sons mainatges. Atau, Poseidon, Ades, Èra, Demetèr, e Èstia que sortín deu vente deu lor pair.

Reconeishents, qu'ajudèn lo lor sauvaire, Zèus, a vàder lo rei deus dius. Qu'estò la debuta deus dius.

Vocabulari

borrassa: lange

Caòs: [Chaos] lo rambalh. Que representa çò qui ei o pareish desorganizat, desordonat, confús. Que fracatjava l'Univèrs dens la soa corsa hòla. 

Ciclop: qui a sonque un uelh

estujar: cacher

Tartar: au començament qu'ei un diu primitiu mès que serà viste lo nom deu lòc: los In·hèrns (lo Tartar).

Etacontir: [Hecatonchire] qui a cent mans (e cinquanta caps qui getan huec)