La cramba secreta

Un matin ensorelhat, quate amics, Lèo, Emma, Ugo e Cloè, que's retròban entà jogar dens lo jardin de la mairbona de Lèo. Tots qu'an entenut parlar d'ua cramba secreta, amagada dens lo vielh ostau. Emma que perpausa d'anar explorar lo solèr. Los autes qu'accèptan dab plaser.

Que garrapan los escalèrs carrincaires, obreishen la pòrta deu solèr qui ei pas estada visitada despuish bèra pausa. Que veden vielhas malas e mòbles recobèrts de linçòus blancs. Ugo que tira lo linçòu. «Espiatz los libes!» ce ditz. E que's bremba de çò qui la soa mairbona l'a contat: darrèr un d'aqueths libes, qu'i a un indici qui mia a un tesaur amagat.

Qu'obreishen los libes, que huelhetan las paginas. Sobte, Lèo que tròba un tròç vielh de papèr plegat. Que s'assètan en cercle, que l'obreishen. «Ua mapa!» ce s’exclama Cloè. Ua mapa misteriosa mercada d'un X gran e roi . «La mapa deu tesaur!» ç’ajusta Emma, los uelhs lusint de gai.

La mapa que conduseishen tau jardin, darrèr lo casso gran qui la mairbona de Lèo aima tant. Que corren peu jardin florit, e que s'arrèstan au pè d’un gran arbo majestuós. « Qu'ei ací », ce marmusa Cloè, en espiant lo sòu recobèrt de flors de margalida. Dab palas petitas, qui avèvan pres suenh de portar, que començan de cavar, lhevant la tèrra mòbla dab precaucion.

Après quauquas minutas, Ugo que truca quauquarren de dur. «Qu'èi trobat quauquarren!» ce crida dab excitacion. Dab lo amics, qu'ac sorteishen un cròfe deu sòu.

Dab un drin de dificultat, que s'i escaden a obrir lo cubertís. A l'interior, que i a pèrlas de colors vivas, pèças dauradas lugrejantas, jòias ancianas e mes, un quasernet de cuer, plea de nòtas e de dessenhs deus beròis. «B'ei de non pas créder!» ce s'exclama Emma.

Lèo que legeish quauques passatges deu quasernet, que compren qu'aqueth tesaur apartienè au son arrèrpairan qui avèva volut partatjar las soas trobalhas dab los sons descendents, e qui avèva imaginat aqueth jòc.

Fin finala, los mainatges que decideishen de gardar aqueth secret enter eths e de’s soviéner tostemps d'aquera aventura beròja. La lor amistat, ahortida per aquera quista, qu'ei lo mei preciós deus tesaurs qui an podut descobrir.

Vocabulari

amaga: cacher

arrèrpairan: arriere-grand-père

carincaire: grinçant

cròfe: coffre

cubertís: couvercle

linçòu: drap

lugrejar: luire

mairbona: grand-mère

mapa: carte (géogaphique)

marmusar: murmurer

solèr: grenier