La mòta castrau de Ròcahòrt

D'autes còps, bèth temps a, qu'apielavan* tèrra en un montet* qu'aperavan mòta castrau. Que hasèva un punt haut tà susvelhar los entorns*. E sovent, que cavavan un varat au torn de la mòta tad emparà's* deus herumis* o deus enemics.

Ua legenda que conta la creacion de la mòta castrau de Ròcahòrt… Ua dròlla d'istòria!
Pr'amor qu'ei l'istòria de Gargantuam. Aqueth gigant que's passejava peus costalats d'Armanhac en cèrca de herumi*. Qu'èra ahamiat lo pire*. Qu'ac caçava tot: lèbes, cabiròus, cèrvis, sanglars, esquiròus*, taishons*, mandras*… tot çò qui pòrta perissa*!

Un dia qu'èra a córrer e a córrer darrèr un ors, e atau, lo gigantàs qu'arribè a Tursan. Be n'avè ua hartèra de córrer per Sagòrra e Magòrra, e lo Mont*! Alavetz que s'estanquè, que s'assedó, que s'ajacè e, abans de clucar*… que's secotí las bòtas au dessús de Ròcahòrt, e los tarròcs* de tèrra, en càder, que formèn la mòta.

... E crac e cric qu'èi lo conte fenit, e cric e crac qu'èi lo conte acabat.

Vocabulari

apielar: amasser

clucar: sommeiller

córrer per Sagòrra e Magòrra, e lo Mont: courir par monts et par vaux, bourlinguer dans tous les sens

emparà's: se protéger

entorns: alentours

esquiròu: écureuil

herumi: bête sauvage

mandra: renard

montet: monticule

perissa: fourrure

pire: mec, keum

taishon: blaireau

tarròc: morceau