La tor que tocava lo cèu

Plan luenh d’ací, qu’existís un lòc a l’ombra de la montanha mès hauta deu monde. Aqueth lòc que s’apèra Sikkim e qu’i demora un paisan dit Wu que neurís porquets.

Un jorn, après un gran vent, Wu que s’avisa que tots los pòrcs se son escapats. Hòrt triste, que camina sense s’arrestar cap tà la montanha entà cercar los animaus aimats.

Los jorns que venguen setmanas, las setmanas mesadas, e las mesadas annadas. D’autes òmes que serén tornats tà las soas bòrdas, mes pas Wu. Que cèrca totjorn los animalets e que camina cap tà la montanha dinc a arribar au cèu. En aqueth lòc plan polit, Wu que troba los pòrcs. Qu’ei tant urós que prega las personas deu cèu de’u deishar demorar dab los pòrcs. Totun, aqueras que s’i refusan e que’u disen:

— Non pòts pas víver ací. Que’t cau tornar tà Sikkim.

Wu que preng lo long camin de tornada. En arribar a Sikkim, que conta a tots las meravilhas qu’a trobat au cèu.

— Que nos cau conéisher aqueth lòc meravilhós! disen tots. Se bastim ua tor, que poderam arribar au cèu plan mès viste.

Atau las gents de Sikkim que’s amassan entà bastir la tor, solèr sus solèr; en deishar sonque un òme sus la tèrra entà la gardar. Après un temps, quan la tor ei quasi au cèu, las gents que començan de s’escapar las paciéncias e fòrça d’enter eras que pensan:

—Se ajam ganchets entà penjar còrdas, que’us poderem lançar tà las nublas e escalar dinc au cèu.

De solèr en solèr, que’s disen los uns aus autes:

— Nos cau ganchets!

Lo messatge qu’ei tan dit e tornat dit que, en arribar au purmèr solèr, l’òme de la tèrra qu’enten:

— Nos cau que hàcias càder la tor a còps de pigassa!

Autanlèu, l’òme que comença de balhar còps de pigassa a la tor dinc a la hèr càder.

Adara, que i a ua taca enòrma au miei de Sikkim. Qu’ei lo lòc on tombè la tor que tocava quasi lo cèu.

Vocabulari

ganchet: crochet

mesada: durée d'un mois

pigassa: hache

s’escapar las paciéncias: perdre patience

solèr: étage