Duas graulhas

Qu'ei l'istòria de duas graulhas. Que demoran totas duas plan urosas a Japon, mes dens vilas diferentas; L'ua que demora a Kyoto e l'aute a Osaka. Un matin, las duas graulhas que's desvelhan; que s'avejan, alavetz que decideishen d'explorar autes endrets:

— Uei que parteishi entà Osaka, ce's ditz la graulha de Kyoto.

— Uei que vau entà Kyoto, ce's ditz la graulha d'Osaka.

Shens ac saber, lo medish dia, las graulhas que plegan los lors ahars e que parteishen en sautant sus la rota de la montanha qui religa las duas vilas. Lo viatge qu’ei mei long que previst; las duas graulhas, plan alassadas, que s'arrèstan au som de la montanha.

Las duas graulhas que s'espian dab emocion puish que’s saludan e que començan de parlar. Qu'ei atau qu’aprenen on van.

— Be vau entà Osaka! ce ditz la graulha de Kyoto. Qu'èi entenut a díser qu'ei ua vila meravilhosa.

— Be vau entà Kyoto! ce respon la graulha d'Osaka. Que disen qu'ei ua vila esplendida.

— Qu'ei de dòu har que ne siam pas mei granas, ce ditz la graulha de Kyoto. Si l'èram, que poirem véder, deu haut d'aquera montanha estant, la vila qui volem visitar.

— B'èi ua bona idèa! ce s’escrida la graulha d'Osaka. Que’ns vam quilhar sus la punta de las patas de darrèr e apiejà’ns l'ua contra l’auta. Atau que poderam véder la vila on vam.

Alavetz las duas graulhas que's quihan sus la punta de las patas e que's gahen per las patas de davant entà non pas tombar. La graulha de Kyoto que lhèva lo cap e qu'espia cap a Osaka. La graulha d'Osaka que lhèva tanben lo cap e qu'espia cap a Kyoto.

— Be soi decebuda! ce ditz la graulha de Kyoto. Osaka qu'ei com Kyoto.

— Be soi decebuda! ce ditz la graulha d'Osaka. Kyoto qu'ei com Osaka.

Ad aqueth moment, la graulha de Kyoto que ditz:

— Que soi urosa qu'ajam descobèrt aquò, adara que's podem estauviar lo long viatge e tornar tà casa.

Alavetz, las duas graulhas que's disen adishatz e en sautar de gai que se'n tornan tà casa.

Las duas graulhas qu'avèvan oblidat que totas las graulhas deu monde an uelhs suu dessús deu cap. En hèit, qu'avèvan vist çò qui èra darrèr eras e non pas davant. La graulha de Kyoto qu'espiava cap a Kyoto e la d'Osaka qu'espiava cap a Osaka!

Conte folcloric de Japon

Vocabulari

alassada: fatiguée

au còp: en même temps

avejà's: s'ennuyer

darrerau: derrièrede dòu har: dommage

estauviar: épargner

religar: relier