Leo e lo planeta luenhèc
Leo qu'ei un gojat curiós e brave, dab lo peu boclat e los uelhs coquins. Qu'ei un joen pilòt de tria. Qu'a aprés a navigar dens los cèus mercés au son pair, un ancian astronauta.
Un dia, Leo que recep ua mission especiau de l'Agéncia Espaciau Universau. "Leo, ce ditz lo director de l'Agéncia, qu'avem besonh de tu entà ua mission plan importanta. Qu'avem descobèrt senhaus qui vienen d'un planeta luenhèc, e que pensam qu'ua civilizacion perduda s'i amaga. Ès prèst entà l'aventura?" Leo, dab un arridolet gran, que respón : "Quiò, be soi prèst! Que vau descobrir aquera civilizacion!"
Lo dia de la partença, Hugo que monta a bòrd deu son vaishèth, lo "Viatjaire 3", un vaishèth tot de metau argentat, dab lutz coloradas qui clinhotejan. Deguens, qu'i a ecrans qui mòstran las estelas e botons qui contròlan cada movement deu vaishèth. Leo que s'installa dens lo son sèti, qu'estaca la soa cinta e que ditz: "Partit entà l'aventura!" Dens un brut de tron, lo vaishèth que's lhèva au dessús de las nublas. "La Tèrra be vad tota petita!" ce s'exclama Leo en espiant peu bujau.
Après mei d’un dia de viatge, Leo qu'arriba suu planeta luenhèc. Qu'ei cobèrt de bòscs d'un verd clarejant e entornejada de lacs blus.
Que's pausa tot doç sus la susfàcia deu planeta. En sortint deu vaishèth, que senteish un vent doç sus la soa cara. "Oah, b'ei bèròi ací!" Alavetz, que comença d'explorar los entorns. Los arbos que son gigantescs, e las flors de totas las colors. Sobte, qu'apercep roeinas ancianas. "Adishatz? I a quauqu'un?" ç'apèra Leo. Sobte, ua lutz que clinhotèja e ua creatura petita qu'apareish. Qu'ei un alien dab uelhs grans e lusents, e dab antenas suu cap.
"Leo! B'ès arribat fin finala!" ce ditz la creatura d'ua votz doça. "Que m'apèri Luma. Que t’esperam despuish longtemps. Qu'èm los Gardians de las Estelas. Qu'avem perdut la nosta tecnologia e lo noste saber-har, bèth temps a. Qu'avem besonh de la toa ajuda entà reparar lo noste vaishèth e tornar a noste."
Leo, Luma e los autes aliens que's hican au tribalh. Après tres setmanas, lo vaishèth qu'ei reparat. Qu'a l'aire drin fatigat, mes qu'ei prèst de volar un còp de mei. "B'ei de non pas créser! Qu’avem escadut" ce s'exclama Leo, los uelhs lusents d'excitacion.
Fin finala, après un adishatz calorós, los aliens e Leo que tornan a casa. "N'oblidarèi pas jamei aquera aventura!" ce pensa Leo.
Vocabulari
amagar: cacher
bèth temps a: il y a longtemps
brave: courageux
bujau: hublot
clarejant: éclatant, brillant
clinhotejar: clignoter
de non pas créser: incroyable
de tria: excellent, de bonne qualité
entorns: alentours
estacar: attacher ; estacar la soa cinta: attacher sa ceinture
hicà's au tribalh: se mettre au travail
nubla: nuage
roeinas: ruines
saber-har: savoir-faire
tot doç: doucement
tron: tonnerre
vaishèth: vaisseau