Leò qu'ei un pirata

A Leò, que l’agradan las istòrias de piratas. Que s’imagina passar* las mars en un batèu dab un drapèu negre e descobrir tesaurs en islas luenhècas*.

Aqueste vrèspe, lo son pairbon* qu’ei vengut dab un paquetòt. En dehens, que i a pintruras de cara* e ua cluca* entà l’uelh.

– Que soi un pirata, ce ditz en tot sorríser.

Lo pairbon que’u pintra ua barba negra e ua cicatriça sus la maishèra*.

– Espia pairbon. Soi un pirata de vertat?

– Òc ben. Que’t manca sonque de trobar lo tesaur.

– Lo tesaur? Mes, a noste, n’i a pas nat tesaur, ce ditz Leò decebut*.

– Hèm! Que’m demandi... Espia devath deu lheit, a véser se tròbas quauqu’arren...

Leò qu’espia de tira* e que descobreish ua arca* dab ua petita clau daurada dens la sarralha*. Qu’aubreish l’arca e que i tròba un gran mocader* roi tà botar suu cap e un sacòt dab vint pèças de chocolat.

– Adara, òc, qu’ès un pirata de vertat, ce ditz lo pairbon.

Anne-Pierre Darrées

Vocabulari

arca, còfre, cròfe : coffre

cara : visage ; pintruras de cara : peintures pour le visage

cluca : bandeau pour cacher un oeil

de tira : tout de suite

decebut : déçu

luenhèc, luenhèca : lointain, lointaine

maishèra : joue

mocader : mouchoir

pairbon : grand-père

paquetòt : petit paquet

passar : traverser

sarralha : serrure