Lo printemps

Un matin de printemps, Lèa que's desvelha dab un arridolet gran sus la cara. Que sap que lo printemps ei totun arribat. Que sauta hòra deu son lheit, que's passa lo son pijama blu e que's precipita tà la cosina entà dejunar.

"Mamà, mamà ! Lo printemps b'ei aquí ! E pòdi anar tau jardin ? ce s'exclama Lèa dab estrambòrd.

Mamà, en arridolar, que'u respón : " qu'ei vertat, berogina ! Pren lo ton dejunar e qu’anaram explorar lo jardin aqueste vrèspe. "

Lèa que sauta de gai en enténer aquò. Que l'agrada d’anar dehòra, tà jogar dens la natura. Qu'acaba lèu lo son bòl de cerealas e que's prepara entà ua jornada d'aventuras printanèras.

Lo vrèspe qu'arriba e Lèa e Mamà que sorteishen dens lo jardin. Tot doç, los rais deu só que'us rescauhan la pèth. Lèa qu'obsèrva los arbos e las flors dab curiositat.

"Mamà, espia totas aqueras flors coloradas ! " ce s'exclama.

Mamà qu'assenteish. "Quiò, lo printemps que pòrta colors navèras au noste jardin. Vòles que's hèm a la caça deus tesaurs ? Que't vau balhar ua lista de flors e que'us deuràs trobar."

A Lèa que l'agrada aquera idèa. Mamà que'u balha la lista e que començan la recèrca. Lèa que cor peu jardin, en tot cercar cada flor de la lista. Que troba cocuts e cocurèlas jaunas e tanben beròjas lilòias blancas.

Mentre que Lèa contunha la soa caça deus tesaurs, nublas grisas que començan de s'apielar dens lo cèu. Las prumèras gotas de ploja que començan de tombar.

"Mamà, n'aimi pas la ploja. Que va guastar la nosta jornada !" ce ditz Lèa dab un aire decebut.

Mamà qu'arridòla e que'u ditz : "la ploja que pòt estar ua suspresa beròja. Espia, quan la ploja tomba sus las flors, que'us balha aiga entà créisher e s'espandir enqüèra mei. En mei, après la ploja, que poiram cercar escargòlhs e vèrmes de tèrra dens lo jardin."

Léa qu'espia Mamà, estonada. N'avèva pas jamei pensat a la ploja d'aquera faiçon. Que lheva lo cap entà recéber las gotas de ploja.

Fin finau, la ploja que cessa lèu e lo só que torna. Lèa e Mamà que reprenen la lor exploracion deu jardin. Que de causas a contar a Papà quan tornarà de las crompas !

Vocabulari

assentir: acquiescer, être d'accord

berogina: ma jolie (mot affectueux)

cocut, primauguèra: primevère

escargòlh: escargot 

estonada: étonnée

estrambòrd: enthousiasme

guastar: gâcher

lilòia, pimparèla: jonquille

sautar de gai: sauter de joie

tot doç: doucement

vèrme de tèrra: ver de terre