Lo robòt que cèrca lo pair

Un còp èra, un inventor que vivèva dens un vilatge de la Ribèra.

Qu’avèva creat lo prumèr robòt intelligent e que l’aimava com lo son hilh. Com n’existiva pas nat robòt sus Tèrra, l’inventor que’u voló balhar hrairs e sòrs robòts. Mes que’s morí abans d’ac poder har e lo robotòt que’s trobè solet.

L’inventor qu’avèva dit au robòt qu’a la sua mort anaré au cèu. Alavetz, entà poder tornar trobar lo son inventor, lo robòt que decidí de’s har alas.

Mercés a la atrunas de l’inventor, lo robòt que s’i escadó a bastir-se un parelh d’alas. Que las estaquè dens las soa esquina e que montè au som de la mei grana de las penas. Un còp en haut, que sautè dab las soas alas plan desplegadas. Mes qu’èra tan pesuc que s’esclafè suu sòu.

Lo robòt, un chic bonhat, ne perdó pas l’espèr e que’s bastí ua catapulta. Un còp installat dessús, qu’estó projectat cap au cèu. Que toquè quasi las nublas e que volategè un momentòt, mes aquò ne sufí pas. Que tornè càger e que s’esclafè un còp de mei.

Lo robòt qu’èra quasi copat, mes que persistí. Que bastí dus reactors poderós qui estaquè au devath deus sons braces.
Quan avó acabat, que’us aluquè e qu’estó propulsat dens l’espaci.

Malaja, ne trobè pas nat traç de l’inventor. Per contra, que rencontrè un engenh estranh.
— Qui ès? ce’u demandè lo robòt.
— Que soi un satellit, ce digó lo satellit. Que hès ací?

Lo petit robòt que responó :
— Que cèrqui lo men inventor qui ei partit au cèu. Sabètz on se tròba?
— N’ac sabi pas, ce responó lo satellit. Mes se vòs, que pòts demorar ací dab nosauts.

Tres autes satellits que s’apressèn. Fin finala, lo robòt que demorè e que viu tostemps dab eths.

Vocabulari

alucar: allumer

atruna: outil

bonhat: cabossé

engenh: engin

esclafà's: s'écraser

estacar: attacher

esquina: dos

parelh: paire ; parelh d'alas: paire d'ailes

pena: falaise

s’i escàder: réussir