Qu'espèri lo pair Nadau
Dehòra, sobte, que i a un brut deus grans.
Que sauti deu lheit, corri a la finèstra e que possi los contravents.
La lua devath la nèu que lusís com au plen dia.
Alavetz, que vesi ua lisa petitòta e ueit rèns tot petits miats per un òme viu e leugèr.
Mès rapides que las aglas, los rèns que galòpan; eth que'us apèra en cridar:
"Anatz Arsecós, anatz Dançaire, Ambriu e Vop! Endavant Cometa! Cupidon endavant, Tron, Lambret, anem, anem... Per dessús los teits, Anatz! Anatz mès viste enqüèra!"
E, en un virat d'uelh, qu'enteni suu teit lo brut deus lors esclòps qui pampan. Lo momentòt qui seguís, lo pair Nadau d'un saut que devara per la cheminèia.
Que porta ua perissa deu cap aus pès, cobèrta de brasas e de soja, e, sus la sua esquia, qu'a ua banasta plea de joguets.
Los sons uelhs que lugrejan de bonaür, las suas maishèras que son ròsas, lo son nas roi cerisa, que's vei lo son arridolet per la soa barba blanca com nèu.
Qu'a ua cara larja, un vente petit, tot rond qui bolega quan ritz; qu'ei maisherut e rebombit com un hadet vielh. Ne'm pòdi pas empachar de ríser e d'un simple virat d'uelh, d'un signe deu cap que'm hè saber que saunegi pas: qu'ei eth!
Puish, sense díser un mot, que plea las caucetas. Que's torna, que's freta lo nas e d'un gèste petit que torna partir per la cheminèia.
E dens l'aire qu'enteni :
"Bon Nadau a tots e a tots ua bona nueit."
inspirat deu prumèr conte deu pair Nadau, de Clément Clarke Moore, New York, lo 23 de deceme de 1823.
Vocabulari
Los noms deus ueit rens deu Pair Nadau:
Arsecós (Fougueux), Dançaire (Danseur), Ambriu (Fringant), Vop (Renard), Cometa (Comète), Cupidon (Cupidon), Tron (Tonnerre), Lambret (Éclair)
agla: aigle
arridolet: sourire
au plen dia: en plein jour
banasta: hotte
bolegar: bouger
bonaür: bonheur
brasa: cendre
esquia: épaule
hadet: lutin
lisa: traineau
lugrejar: luire, scintiller
maishèra: joue ; maisherut: joufflu
pampar: frapper (le toit ou le sol en faisant du bruit)
perissa: fourrure
rebombit: rebondi
rèn: renne
saunejar: rêver
soja: suie
virat d'uelh: clin d'oeil (en un clin d'œil : très vite, juste le temps de fermer et ouvrir un œil)