Zoè, Leò e lo bòsc embroishit

Enter sèrras verdolivas e arrius lugrejants, un bòsc dense e misteriós que's trobava a la boca deu vilatge. Aqueth bòsc, ce disèva los ancians, qu'abrigava creaturas extraordinàrias e secrets oblidats despuish bèra pausa. E qu'èra tanben coneishut peus sons dangèrs.

Un dia, Zoè e Leò que hasón ua equipa tà combàter aqueth broishami. En tot córrer, que prenón la direccion deu bòsc. A mesura que s'en·honsavan dens lo bòsc, la lutz deu só que's vadèva mensh hòrta, en crear un ambient misteriós e escur. Los arbos immenses, dab camas broncudas e brancas trilhadas, que formavan un plafon de huelhum. Qu’audivan lo cant triste deus ausèths, la brusida inquietanta de las huelhas, e lo gorgolhís shord d'un arriu non luenh.

Au cap d'ua pausa, que realizèn que n'èran pas tot sols. Un grop de creaturas escuras e miaçantas, lhèu dracs, deus uelhs brilhants, que's tienè davant eths, en barrar lo passatge. Mes qu'avèvan ganhat la maquina de superpoders. Alavetz, que hasón tremolar los arbos coma s’èran ua armada de hantaumas e las estranhas creaturas s’escapèn, espauridas.

Aquí, tot au ras, au pè d'un casso, que lusiva ua pèira blancosa e planèra, aquera pèira poderosa dont los avèvan parlat tanben los ancians. Zoè e Leò qu’estirèn lo lor braç e que pausèn, amassa, la man sus la pèira. La pèira que lusí mei hòrt. Que declarèn la frasa qui avèvan preparada: «Que lo bòsc sia protegit e que tots los sons secrets demoren en seguretat entà las generacions futuras.» La pèira que lusí enqüèra mei intensament, com si avèva entenut lo vòt. De tira, Zoè e Leò que's sentín plens d'ua energia navèra, com si lo bòsc eth medish que'us mercejava.

Qu’avèvan passat lo prumèr nivèu. Game over.

Vocabulari

a la boca de: à l’orée de
blancosa: blanchâtre
broishami: ensorcellement
broncut: noueux (pour du bois)
brusida: bruissement
cama: tronc (d’arbre)
embroishir: ensorceler
espaurir: apeurer
gorgolhís: murmure (d’un ruisseau)
huelhum: feuillage
lugrejant: scintillant
miaçanta: menaçante
planèra: plate
trilhar: entrelacer, entrecroiser
verdoliu: verdoyant