Mitologia: 1- los dius d'Olimp

Las religions anticas que comprenen mei d'un diu e d'ua divessa, que las aperam religions politeïstas. Qu'existish la religion deus Grècs, la deus Egipcians, la deus Maias (Guatemala), la deus Berbèrs (Africa), la deus Chinés e hèra autas. En cada religion, las aventuras deus dius que fòrman la mitologia.

En envadir lo noste país, los Romans que portèn la lor mitologia, era medisha inspirada de la deus Grècs. Que cau díser que la mitologia grèca ei l'ua de las mitologias mei desvolopadas de l'istòria antica.

Segon los Grècs, sèt dius e cinc divessas màgers que viven suu mont Olimp sovent estujat per crums. Aqueth mont qu'ei la montanha mei hauta de Grècia, dab un som de 2 918 mètres. Que creden tanben que los dius semblan aus umans: qu'an la medisha aparéncia e lo medish comportament. Que pòden estar colerós, gelós... mès que son immortaus.

Los dius d'Olimp que beven nectar (ua mescla de vin e de mèu, dens la quau macèran flors) e que's neurishen d'ambrosia. Mercés a l'ambrosia (benlèu un mèu sauvatge) los dius que son de mau véncer. De mei, qu'intervenguen sovent dens la vita deus umans. 

Au miei deus dotze d'Olimp que son Zèus lo rei deus dius, Èra la sua hemna e divessa deu maridatge, Poseidon lo diu de la mar, Demetèr la divessa de l'agricultura, Atena la divessa de la sapiença de la guèrra e de l'artisanat, Afrodita la divessa de la beutat, Ermès lo messatgèr deus dius.

Los dius d'Olimp – Sébastien Cornu – musèu Carnavalet, París.

Vocabulari

crum: nuage épais

estujar: cacher

Maias: Mayas

politeïsta: polythéiste (=plusieurs dieux)

som: sommet

Afrodita: Aphrodite

Atena: Athena

Demetèr: Demeter

Èra: Hera

Èrmes: Hermès

Poseidon: Poséidon

Zèus: Zeus