Mitologia 2- Atena

Atena qu'ei au còp la divessa deus conselhs savis, de la Saviesa, la divessa de la Guèrra, de l’Estrategia e de la defensa de las ciutats, la protectora deus eròis e la patrona deus artisans e de l'artisanat.

Un dia, Zèus que sedusí Mestís e que l'entrainè cap au son lhèit dab doças paraulas. Puish, lo maitin, tà estar segur de non pas aver un mainat, qu’obrí la boca e que l'avalè! Quauques temps après, en se passejar sus las ribas deu lac Triton, Zèus qu'estó pres d'un mau de cap tan violent qui'u semblè que lo son crani anava esclatar. Alavetz, que demandè a Efaistos, lo diu de la harga, de'u obrir lo crani. Atau, que gessí, adulta e vestida en guerrièra, la soa hilha Atena.

Las batalhas ne l’agradavan pas; au contra, qu'èra urosa quan podèva hèr cessar ua peleja o quan podèva sostiéner lo dret per mejans pacifics. Totun, un còp engatjada dens la batalha, n’èra pas jamei vençuda.

Dens la mitologia, que’s ditz qu’inventè la lauradera o lo parelh, qu’ofrí l’olivèr e lo higuèr aus umans de l’Atica. Qu’inventè tanben la flaüta e la trompeta; qu'ensenhè los nombres e totas las arts practicadas per las hemnas.

Enfin, que presidiva las arts, las invencions, las amassadas, l'eloquéncia.

 

Vocabulari

Atica: Attique (une région de Grèce)

Efaistos: Héphaïstos, dieu du feu, de la forge et de la métallurgie

flaüta o flabuta: flute

gessir: jaillir

harga: forge

higuèr: figuier

lauradera: charrue

olivèr: olivier

parelh: attelage de bœufs

saviesa, sapiença o rason: sagesse ; savi: sage

 

Imprimer cet article