Ric com Cresus

Lo prumèr de l'an, que cau minjar lentilhas tà aver moneda tota l'annada. Qu'ei ua tradicion nosta desempuish quauques sègles. Benlèu, lo rei Cresus qu'a minjat ua pièla* de lentilhas...

Cresus que neish en 596 ab. J.C. Qu'ei un hilh d'Alyatte II, rei de Lídia en Asia menor. Qu'a ua sòr Arienis e un hrairastre* Pantaleon.

Pantaleon que demora dab lo son pair entà apréner a vàder rei. Mentretant, Cresus qu'ei enviat peu son pair com governador de la ciutat aperada uei Edremit (Turquia). Mes, a la mort deu pair, Cresus e Pantaleon que's disputan e que's hèn la guèrra. Qu'ei Cresus qui ganha. E que hè tuar lo son hrairastre.

Com lo son pair, Cresus que viu dens un país ric: qu'a minas d'aur e que pòt tanben recoltar las palhetas d'aur carrejadas peu Pactole, un arriu deu país. De mei, Cresus que va instaurar un tribut* qui cada ciutat grèca conquistada deurà pagar. Que va tanben prelevar taxas sus las mercaderias* qui passan sus las soas rotas. Qu'ei lo prumèr barbare* a har ua causa atau.

Tot aqueth aur que'u va perméter de har ofrendas aus temples grècs. Per exemple, qu'envia au santuari de Dèlfes 3 000 bueus, 100 bricas d'aur e un sarròt* d'autes presents meravilhós. Alavetz, Cresus que va passar aus uelhs deus Grècs deu son temps peu sobeiran* mei ric e mei poderós deu mond!

 

Vocabulari

barbare: les Grecs appelaient barbare toute personne qui n'était pas d'origine grecque

hrairastre: demi-frère

mercaderia: marchandise

pièla: grande quantité

sarròt: grande quantité

sobeiran: souverain

tribut, redevança, taxa: tribut, redevance, taxe

Imprimer cet article