Las quilhas de nau

Las quilhas de nau que son un jòc jogat sustot en Bearn, Lanas e Bigòrra. Lo noste Enric* qu'i jogava dejà. Qu'ei un pòc lo bowling deu sud-oest. Que cau har càder nau quilhas de husta (de hac* per mélher díser), hautas de 96 cm,  dab un bòlo* de noguèr* de diamètre de 30 cm e que pesa mei de 6 kg. La quilha que pòt durar tres mes; après, a còps, que's copa.

Entà véder la fabricacion d'ua quilha, clica ací.

Las quilhas qu’an tres partidas: lo cap, la poma e lo pè. Que son pausadas sus un plòt de husta aperat pitèra o piteta, a 2 m 15 l'ua de l'auta. 

Lo jòc que's hè dens un endret dit un quilhèr. Que tròbas un trentenat de quilhèrs de Dacs dinc a Lanamesa. Be i avó tanben un quilhèr a Bordèu, París, Argeria, Buenos Aires, Los Angeles o New York!

Lo jogador que s'apèra lo quilhon. Lo quilhon qu'a a escàder figuras o jòcs fixats. Que i a dotze jòcs possibles: sèt jòcs bracs e cinc longs.

Dab un sol balanç*, lo jogador que truca la prumèra quilha, dita quilha de man, dab lo bòlo, puish ua auta aperada lo plom.
La quilha de man qu'a de har càder d'autas quilhas.

Si lo bòlo toca lo plom e demora dehens deu quarrat, lo quilhon qu'a heit choès o bon; que pòt tornar jogar (que disen rebàter). 

A cada jòc que s'i comptan las quilhas cadudas.

Entà véser lo foncionament, espia l'animacion deu site ací. 

Lo prumèr gran concors qu'estó a Dacs en 1898. Desempuish 1948, que i a ua Federacion Francesa de Quilhas a Ortès. Que son mei de 650 sòcis. Que i a campionats cada an. Los joens que s'i interessan de mei en mei. 

Vocabulari

arronçar o lançar : lancer

balanç : impulsion, jet, balancement

bòlo : boule pour jeu de quilles

Enric : Henri IV

hac o hau : hêtre

noguèr : noyer

quilhèr o plantèr : quiller ou plantier (endroit où on joue au jeu de quilles de neuf)