NATURA

Ausèths deu casau

De segur, qu'as vist ausèths dens lo ton casau o au torn deus ostaus. Coma los reconéisher?

Lo colom qu'ei un béth ausèth dab blanc sus l'ala e suu còth. 

La tortora qu'a las alas rossas e que gorgola. 

L'agaça qu'ei negra e blanca. Coma canta sovent e lontemps tà díser la medisha causa, un arreproèr que ditz: charlar coma ua piga.

Lo gai qu'a plaps blus sus l'ala. Que preveng tots los animaus deus dangèrs en cridar hòrt.

Los mèrlos que son mes petits. Lo mascle deu mèrlo qu'ei tot negre e la hémia tota moreta.

Enqüèra mes petits, non cau pas con·hóner lo pinçan dab lo vente irange, la parra dab la cravata negra e lo gòlis dab lo peitrau roi.
A noste, que disem: quan lo pinçan ditz "uit uit uit", que vòu plàver. La parra que sap comptar, que ditz "un o dus, un o dus" e, a còps, "quinze o sètze, quinze o sètze".

Quan lo gòlis a fred, qu'en·hla las plumas tà escalorí's, alavetz qu'avem un arreproèr que ditz: estar en·hlat com un còtharroi.