L'auratge
Los auratges que's fòrman dens los crums aperats Cumulonimbus. Aquestes crums que son hèra hauts en altitud.
Quan lo baish deu crum ei caut e cargat d’umiditat e lo som hred e eishuc*, que’s crea un corrent qui mia gotètas d’aiga deu baish deu crum de cap au som. Quan la temperatura deu som deu crum devara a – 32 grads, que’s fòrma glaç.
Dab lo vent, ploja o glaç que cad au sòu. La ploja d’auratge que pòt èster hòrta. De mei, eishagatadas* que hèn aigats* o peirabatudas* qui destruseishen culturas. Que i pòt aver ventòrlas* qui hèn càder arbes e s’amian tèits de maison.
Lo hodre* qu’acompanha l’auratge. Qu’ei ua descarga electrica acompanhada d’eslambrecs* e de perigle*. Que’s pòt formar dens un crum e atau lo crum qu’ei esclairat. Que’s pòt tanben formar entre crums o d’un crum au sòu: un eslambrec e’s hè entre los crums o que tòca lo sòu.
Lo perigle ei lo brut qui hèn las descargas electricas. Com la lutz va mes viste que lo brut, que’s véden los eslambrecs abans d’enténer lo perigle.
Lo hodre qu'ei dangerós. Que pòt tuar bèstias e personas o ahuecar maisons. Pr’amor de quò, que i a virahodres* sus las maisons.
Tà véser un eslambrec au ralentit, tot shuau:
Vocabulari
aigat: crue
eishagatada: forte pluie
eishuc: sec
eslambrec: éclair
hodre: foudre
peirabatuda: chute de grêle
perigle: tonnerre
ventòrla: bourrasque
virahodre: paratonnerre