Lo cabiròu
Qu’ei aisit de véder un cabiròu pr’amor qu’ei un petit cervide arrós* qui s’aprèssa de las maisons entà passar la nueit. Lo jorn que l’estima mei los bòscs e los romegàs*.
En blu, la hautor deu garròt deu cabiròu
Quan neish, en mai o junh, lo cabirolet que pèsa 1,3 a 2,3 kg, com un petit nenè. A còps, los petitons que son minjats per un renard, un can, un lop o un gat-lop (linx) o enqüèra per un singlar. Entà aperar la mamà, que hè un crit dit un piulament*.
A l’atge adulte, que mesura 55 a 80 cm de hautor au garròt, qu’ei a díser dinc au haut de las espatlas e que pèsa 15 a 30 kg.
Lo mascle que pòrta arrams*. Qui creishen a la prima e que cagen a l’abòr*.
La cabiròla, o la craba, qu’ei la hémia* deu cabiròu. Que gavida los joens de l’annada aperats cabirolats*.
L’animau que viu 7 a 8 ans, a còps dinc a 15 ans. Que minja èrba, borrons*, huelhas e buscalhs*. L’ivèrn, que minja tanben romecs*, brana* o gèira*. Qu’ei un animau pauruc e que s’escapa quan audís un brut. Benlèu, as audit un cabiròu o ua cabiròla lairar? E òc, que lairan, un pauc com un can. Escota.
Ne cèrques pas a córrer dab eths. Que hèn sauts dinc a 2 m de haut e 6 m de long; de mei, que cor a 40 km/h dab puntas a 90 o 100 km/h.
Aquestes dus animaus que son un mascle e ua hémia. Quinas diferéncias e veses enter los dus?
Aubrir o telecargar la responsa.
Vocabulari
abòr: tardor, autona, automne
arrams: bois d’un animal (chevreuil, cerf)
arrós: roux
borron: bourgeon
brana: bruyère
buscalh: broquilha, petite branche
cabirolat: brocard (jeune chevreuil de moins d’un an)
gèira: gèdra, èdra, lierre
romèc: arromèc, sèga, ronce
romegàs: arromegàr, seguèr, roncier