Saturne o planèta de gas

Conéisher los planetas deu sistèma solar: quate de ròcas (que disem planetas tellurics), dus de gas, dus de glaç.

Episòdi 6: Saturne

Saturne qu'ei lo planeta sheisau a partir deu Sorelh, après Mercuri, Vènus, Tèrra, Mars e Jupitèr.

Fòto presa per la sonda espaciau Voyager 2

Que'u pòts véser dens lo cèu. Qu'èra conegut durant l'Antiquitat e lo son nom que veng deu dieu roman Saturne. Que pensàvam qu'èra lo planeta mei luenhèc dinc a que lo telescòpi sia inventat.

Qu'ei ua deus mei grans planetas, juste après Jupitèr. Qu'ei compausat de gas leugèrs: idrogèn e èli. N'a pas nada susfàcia solida. Si ei gròssa com 764 Tèrras, qu'ei leugèra: que pesa com 95 Tèrras.

Lo son dia que dura 10 òras (que hè un torn complet sus eth medish en 10 òras). Com vira viste, qu'a pòles aplatits e un eqüator gonflat; que sembla a un balon escargassat.

Qu'ei de color jauna palla e qu'ei entornejat de 62 satellits naturaus (62 luas se vòs). Qu'aperam lo mei gròs Titan. Titan qu'ei l'unic satellit deu Sistèma Solar dab ua atmosfèra importanta. De mei, milions de petitas particulas que fòrman aneths au torn de Saturne.

Vocabulari

entornejat: entouré

escargassat: écrasé

luenhèc: lointain, loin