Comunicar en lo monde – 2
Internet que conteng ua quantitat d’informacions de non pas créser. Cada segonda, 29 000 gigaoctets que son publicats dens lo monde qu’ei a díser 145 milions d’articles coma lo que leges. Qu’ei hòrt interessant mès coma trobar l’informacion que cercas?
Tot prumèr, quan ès connectat, que’t cau un navegador web. Qu’ei ua aplicacion que permet de webejar, consultar paginas deu World Wide Web 1, recuperar e reprodusir los documents.
Los navegadors actuaus (browser en anglés) que permeten de muishar grafics, imatges, sequéncias de vidèo, sons, animacions.
Los mes emplegats que son Google Chrome (65%), Safari (18%) e Edge (3,5%).
Dusau, entà trobar ua informacion au miei de totas las informacions, que’t cau un motor de recèrca (Search engine en anglés), qu’ei a díser Google (91% deus internautas francés que l’emplegan), Yahoo (14% deus internautas francés que l’emplegan), Bing (12% deus internautas francés que l’emplegan)...
Tu que balhas mots claus entà cercar ua informacion, per exemple : “dusau empèri”
Lo motor de recèrca qu’emplega robòts (spiders o crawlers en anglés). Qu’espian lo contengut d’internet, que l’analisan e que trian entà’t perpausar documents que responen a la question pausada. Ací :
Los documents perpausats peu motor de recèrca que son informacions mesas en linha per personas, associacions, escòlas, enterpresas, botigas... sus sites. Que son a gratis o que cau pagar.
arraton.fr qu’ei un site a gratis.
Qu’existish tanben messatgerias entà enviar o recéber corric electronic. Que son perpausadas per fornidors deu servici messatgeria, coma gmail, yahoo mail, outlook, messenger... Las adreças que s’escriven: nom@fornidordeuservice.xxx, per exemple arratondeucasteth@gmail.com
E pòts tanben escambiar informacions e avís dab autas personas sus hialats sociaus, coma Facebook, WhatsApp, Instagram, Snapchat...
Fin finala, qu’as tanben aplicacions especificas a telecargar: meteo, Star Walk (tà reconéisher les estelas), jòcs de tota traca...
Que seguirà
1 World Wide Web o www, teleranha mondiau (toile), inventat per l’informatcian anglés Tim Berners-Lee en 1990.